描述
腦細屋邨長大,伴隨嘅童年回憶,無同鄰居小朋友接觸,中秋無煲臘,新年無派財神,無踢拖落公園玩。只記得放學孭住個好X重嘅書包,在玩具舖櫥窗外睇玩具,在文具店不停試筆,同埋去士多辦館「睇零食」…
無錯,係「睇零食」,因為我唔夠膽買,怕食完後有蛛絲馬跡被屋企人責罵,但面對七彩繽紛嘅零食包裝,好吸引好深印象。其中有兩款零食,因為個名特別,搞到細個時特別想食,但第一次食時竟然已經進入初中年代,就係「脆脆蝦餅」同埋「齋燒鵝」!
脆脆蝦餅,腦細第一次食就麻麻地欣賞,可能撻住個咀唇又無乜味咁。反而,齋燒鵝就有一種驚為天人嘅感覺,細個完全唔撚明佢同燒鵝有咩關係,就算依家大個都唔係太深入了解,但入口果種「脆卜卜」嘅口感,果種聲音就會話到俾我知,係零食帶黎嘅樂趣,同食薯片一樣咁有趣!
到叁拾士多年代嘅腦細,開發研究不少港式美食,直至一年前認識「華園」呢個老品牌老闆,就好想做屬於自己口味嘅齋燒鵝,我地一拍即合,花了一年時間,研發一款希望連年青人都會喜愛嘅齋燒鵝。畢竟現今零食種類太多,太年青嘅都未必試過或聽過呢款歷久不衰嘅港式零食。
各位,特別介紹,由華園及叁拾士多合作研發推出嘅「麻到痺齋燒鵝」登場!
故名思義,就係麻辣口味嘅齋燒鵝。以華園多年嘅經驗,加上腦細喜愛嘅麻辣風味,少少辣但麻度持久,香脆惹味,配啤酒更係絕佳組合!呢款零食,不單滿足腦細嘅味蕾,私心地更加安撫心靈,彌補童年面對齋燒鵝只可遠觀,不可細味嘅「童年陰影」
「麻到痺齋燒鵝」香港製造
重量:60克
產地:香港
最佳食用日期:見包裝上說明
成份:麵筋、植物油、糖、醬油(水、糖、鹽、黃豆、小麥、增味劑(E620、E621)、色素(E150a)、防腐劑(E202、E211))、粟膠、增味劑(E621)、四川青麻椒、指天椒乾、沙爹粉、川花椒、鹽。
本產品含有麩質的穀類、大豆及其製品。
生產此食品的廠房亦處理甲殼類動物、蛋類、魚類、花生、奶類及木本堅果及其製品。