濃神（沙嗲醬）

2018年，叁拾士多嘔心瀝血研發全港首款急凍沙嗲牛肉「塘牛」，以百份百香港味道，加上美國Prime Grade牛肉作招徠，推出以來一直深受大家喜愛，不過，腦細多年來都收到相類似嘅提問⋯⋯

「我唔食牛，可唔可以出塘豬？」
「我唔食紅肉，可唔可以出雞？」
「我唔食肉，但又中意你地呢個沙嗲味，可以點？」
「可唔可以唔放雪櫃呀？室溫方便好多喎！」
「可唔可以寄去外國呀？依家塘牛唔可以寄去英國喎！有無計呀？」

虎⋯⋯好多好多問題，真係唔係咁易解決架！
開發產品黎講，講就Easy，做就Hi Auntie⋯⋯
多年黎，腦細一直有計劃來個改革⋯⋯
點知，諗下諗下，搞下搞下，改下改下，戇下戇下，咁就過左4年，終於有最終解決方案！

介紹返，叁拾士多醬料系列新品「濃神」登場！

濃神，英文”Git Tat Tat Satay”，即係「杰撻撻沙嗲」，故名思義，就知今次呢隻醬料質地係點L樣。

濃神，以「塘牛」中嘅沙嗲醬汁作藍本，時間打造出更具港式茶餐廳風味嘅即食沙嗲醬。

用法簡單，食湯麵湯米粉撈麵，又或者點燒賣魚蛋都好，落一至兩匙羮濃神，絕對一食入魂！

想用來打邊爐？濃神跟湯比例1:3，口味剛剛好，沙嗲濃香惹味。屋企有一樽濃神，駛X落九龍城打邊爐咩！

濃神，真正香港茶餐廳風味，腦細2022瞓身All in 精心研發作品！